J&K nung Angh yimsüsüba temepishiba SC-i angadangtsü

New Delhi, July 22 (Agencies): Jammu & Kashmir nung tang tensa mejungi aliba nung ajemdaker J&K Temzüng ka kübok state nung Angh yimsüsüba benoktsü atema temepishiba ka angadangtsü asoshi Supreme Court (SC)-i melungogo.
Chief Justice, T S Thakur-i aniba bench kati Jammu and Kashmir National Panthers Party (JKNPP)-i benokba temepishibaji taruba hopta angadangtsü atema tuyuogo.
JKNPP atema okatsüri SC dang, tesüiba hopta ana tashi Jammu and Kashmir ya security sepaitem aser police-i amokbanga lir, koba ajanga Kashmir Valley tesem ajak nung mepetmesü aser rara adoker, ta ashi.
Okatsürisa, Jammu & Kashmir Temzüng, section 92 kübok state nung Angh yimsüsüba benoktsüla, ta ashi.
Kasa temepishiba ajanga, Angh dang Jammu and Kashmir Assembly anenjang ta tuyutsüla, kechiyong parnoki pei mapa jeta meinyaker, ta shia lir.
Kasa bench nung justices- FML Kalifulla aser A M Khanwilkar nata densema lir.
Ano külen bench-ia parnok dang, kechiba nenoki iba temepishiba ya Jammu and Kashmir High Court nung mebenok, ta asüngdang.
Ibaji langzüa okatsüri, Jammu and Kashmir High Court ji ‘lock up’ süogo iba den külemi parnok kechaia moutettsü, ta ashi.
“Jammu and Kashmir nung mepetmesü tensa lir aser yangji tzüzüng-ozüng benokteta mali. State nung prangpong yimsüsüba lir aser Valley nung aliba nüburtemi tzü aser mozütema mangur,” ta temepishiba nungsa shia lir.
“Jammu and Kashmir nüburtem pei ki telung nung chiyungtsü, mozü mesüra taküm alitsü atema nüngdakba tanga osettem makai alitsüsa akumer,” ta parnokisa ashi.
Item kulitem nung ajemdaker Jammu and Kashmir National Panthers Party-i, Angh-i Jammu & Kashmir Temzüng, section 92 kübok state nung Angh yimsüsüba benoktsüla, ta temepishiba agütsü.