J&K nung army camp amakdang telungpur 3 den civilian 1 asü

Srinagar, November 25 (Agencies): Tanü Bodhbar nü Jammu & Kashmir nung army camp ka amakdang sepaitemi meyiper rara, aser iba mapang Separatist telungpur asem aser civilian ka süogo.

Senior police ketdangser kati, Kupwara district kübok Tangdhar town nung aliba army camp-i telungpur asem aita kahtepdang security sepaitemi par asemprong kahset, ta ashi.

Tangdhar ya Pakistan den arrtsü anasa lir, aser iba jila nung 3/1 Gorkha Rifles camp lir.

“Iba rara nung army tem atema inyaker civilian ka asü aser junior commissioned officer (JCO) ka yirua mozükidangi anir ao,” ta paisa ashi.

Telungpurtemi camp amak tenzükli iba army camp nung aliba petrol rizünga ayudak nungi mi tulu adok. Telungpur asürtem ket nungi AK-47 rifle asem ngutetogo, ta police-i ashi.

Jaish-e-Muhammad (JeM)-i parnok sasa parnoki iba camp amak, ta tenüng agiogo.

JeM otongdar ta shia nisung kati Srinagar nung aliba news agency ka dang phone ajanga, amakertem jagi army aika kahset aser yirutsüogo, ta ashi.