J&K nung Army temi kiralongrar tetsüti 21 bushi tenzükogo

Jammu, Aami/June 22 (Agencies): Jammu & Kashmir nung Ramzan mapang ita ka piyong telungpurtem anema meinyaki ceasefire aliba Centre sorkari agienba sülen anogo ishika lir state nung kiralongrar tetsüti tenüng 21 Army temi sangdongogo.
Pakistan-i nungitba kiralongrar 21 ji Army temi bushi tenzüktsü, ta osang ka ajanga metetdaktsü.
Kiralongrar 21 nungjagi Hizb-ul-Mujahideen telok nungiparnok 11, Lashkar-e-Toiba (LeT) nungi tenet, Jaish-e-Mohammed nungi ana aser Ansar Ghazwat ul-Hind nungi ka lir, saka pajibo tanep security sepaitemi khasetogo.
Parnok 21 ji category- A, A+ aser A++ ta lemsaa lir, aser parnoki kiralongra mapatem inyakba nung ajemdaker army temi bushir.
Centre nungi BJP-i Mehbooba Mufti-i aniba PDP den teloktep sorkar raksar tang state nung Governor’s rule benoka lir.
Osang angazükba agi, PDP sorkari separatists aser telungpurtem anema sashia meinyakba ajanga BJP melung mesüi liasü.
Centre-i state nung ceasefire agienba sülen tanü mezüng Kashmir nung sepaitemi IS kiralongrar ka tepsetogo.
“Tanü khasetba kiralongrar sangji Islamic State Jammu and Kashmir (ISJK) den tesendaktep lir,” ta Director General of Police (DGP) SP Vaid-i twitter ajanga metetdaktsü.
2017 küm Islamic State-i parnok indang website nung, parnok den affiliate süa aliba telok, Ansar Gazwatul Hind nung lenirji Kahmir nung telungpur, Zakir Musa lir, ta metetdakja liasü.
Tanep Srigufwara tesem nung telungpur aser sepaitem tsüngda raradang civilian ka aser police kata densema asü.
Tanep sepaitemi khasetba telungpur pezü rongnung kabo Pulwama district kübok Talangam yim nungi Majeed Manzoor lir aser ka Srinagar nungi lir ta jangjaogo. Tang tashi nung anabo maitsü mejangja.