J&K nung Arrla 370 agienba sülen tang mezüng khatepogo

Srinagar (Jammu & Kashmir), Luroi/August 21 (Agencies): August 5, 2019 nü Union sorkari Jammu & Kashmir nung Arrla 370 agienba sülen tang mezüng state nung security sepaitem aser kiralongrartem na tsüngda khatepogo.
Mongolbar aonung nungi tenzüka Baramulla district nung sepai aser kiralongrar na tsüngda raradang Jammu & Kashmir police nungi SPO ka asü aser police ka yiru. SPO ji Billal liasü ta jangjaogo aser yirua alisang sub-inspector, Amardeep Parihar ji hospital-i anir ogo.
Kasa rara nung sepaitemia kiralongrar ka khaset, ajisüaka tang tashi maitsü mejangjar.
Mongolbar aonung sepai aser kiralongrar na tsüngda khatep tenzük aser Bodhbar anepdang 5:30 ako nungang rara anen, ta police-i metetdaktsü.
Jammu & Kashmir police-i twitter ajanga, “Rara anenogo. Kiralongrar ka khaset saka tang tashi pa maitsü mejangja. Tesem nung prangpong aser injangtem nguogo. Külem tenzüker SPO Billal-i taküm bendanga agüja süogo. Iba rara nung SI, Amardeep Parihar yirur Army Hospital nung yaridar,” ta metetdaktsü.
Centre sorkari August 5 nü J&K nung Arrla 370 agienba sülenbo tang mezüng Jammu & Kashmir nung sepaitemi kiralongrartem den rarar.
August 5, 2019 nungi tenzüka state nung tenokdangba aika agüja liasü aser tenokdangbatem tesem kar nungbo agiendar. Ano külen tesüiba hopta ana tsüngda Pakistan-i LoC nung ceasefire ozüng alema inyakba kanga bulua kümogo.