J&K nung BJP minister ajak dang Cabinet nungi anentsü tuyuogo

New Delhi/Jammu, Rongchii (April) 19 (Agencies): BJP-i Jammu & Kashmir nung par minister tem ajak dang Mehbooba Mufti’er cabinet nungi anentsü tuyuogo, ta osang angazüker.
Osang angazükba agi, BJP-i J&K nung PDP den telokep sorkari nungi anener masü saka menden lemsashitsü atema lir.
State nung arishi küm 8 tetsür chanu ka dak tashiyim mapa inyaker tepseta toktsüba ajanga BJP aser PDP teloktep anokshiba mapang ka nung tang iba osang ya angazüker.
Ano state nung general election agitsü mapang ana nung lia Kathua nung tashiyim amshia raksatsüba onük nung ajemdaker BJP aser PDP nati teloktep raksatsüa akok, ta bilemer.
Kathua nung tashiyim amshia tetsür raksatsüba ken o nung BJP minister ana cabinet nungi anenba sülen anogo ka lir BJP-i party minister ajak menden nungi anentsü tuyuogo.
Iba tatalokba anema Jammu region nung longkak aitba sentong nung BJP lenirtemia shilem agiogo.
Iba ken o ya CBI nem bushidaktsütsüla, kechiyong Jammu & Kashmir Police dak melung malemer, ta shia nüburtemi takhangba agütsür.
Taküm Aenjeti (January) ita nung arishi küm 8 tetsür chanu ka apuba sülen tebur aikati tashiyim amshia raksatsü aser tesülen tepset, ta Jammu and Kashmir Police indang chargesheet nung shia lir.