J&K nung cable gari lisü tokdangba lendong nung raliwalir pongu tsükset

Srinagar, June 25 (Agencies): Deobarnü Jammu & Kashmir, Gulmarg nung süngdong ka lao cable gari indang lisü tokdangtsüba lendong nung Delhi nungi kibong ka densema raliwalir pongu tsüksetogo, ta police-i metetdaktsü.
Osangbener den jembidang Senior Superintendent of Police Baramullah, Imtiyaz Hussain-i, iba lendong nung Delhi nungi kibong ka- kinüngtsü aser kinüngbu den par tanur ana aser raliwalir meina senzür ka densema tsükset, ta metetdaktsü. Kashmir nüburtem atema sen aruba lenmang rongnung tongtiji tourism lir.
Raliwalirtem senzüba gari ‘gondola car cabin’ indang lisü tokdangba sülen iba gariji metre noklang aika lua tsükok.
Tzüyim level nungi feet 13,780 dak tema nung Gulmarg cable car nung ya raliwalirtem anir senzür. Alima nung cable car project tanabuba jenjang nung iba ya lir, aser ghonda ka tsüngda nisung 600 shi iba gari nung senzür.