J&K nung Congress aser National Conference na loktepogo

Srinagar, March 20 (Agencies): Tanü National Conference (NC) aser Congress nati Jammu & Kashmir nung Lok Sabha menden trok atema party ana tsüngda menden alemba sangdongogo.
Party anapronglai Congress-i NC Tir, Dr Farooq Abdullah anema candidate metoktepdaktsütsü lemtet. Pai Srinagar parliamentary constituency nungi tokteptsü.
NC otongdar kati ashiba agi, Rajya Sabha nung Opposition lenir, Ghulam Nabi Azadi leniba nung züngsem pezü aser Abdullah leniba nung NC na tsüngda Bhatandi, Jammu nung senden ka mena liasü. Iba senden tembangba sülen Abdullah-i, National Conference-i Baramulla, Srinagar, Anantnag aser Ladakh mendentem nungi tokteptsü saka Jammu aser Udhampur menden na nung candidate metoktepdaktsütsü, ta metetdaktsü.
Anantnag aser Baramulla menden na nungbo party anapronglai tokteptsü, ta Azad aser Abdullah nati metetdaktsü.
Linük aser state level nung Abdullah jenjang nung ajemdaker Congress-i pa anema candidate metoktepdaktsütsü.
Abdullah-isa, linük nung telemsa adokdaktsüba communal party tamakok ngudaktsütsü atema Congress-i linük tesem balala nung tanga party tem den lokteptsüla, ta ashi. Tanü iba senden nung Congress nungi Azad dak alia Ambika Soni, Pradesh Congress President Ghulam Ahmed Mir aser taoba mapang Minister Nawang Rigzin Jora nunger liasü aser National Conference nungi Abdullah dak alia Mohammed Shafi Uri, Provincial Presidents- Devender Singh Rana aser Nasir Aslam Wani nunger liasü.