J&K nung Hindu nunger ka CM ser sorkar akumtsüa akok

New Delhi, Chiteni/July 07 (Agencies): Syama Prasad Mookerjee asoba anogomong nung Bharatiya Janata Party (BJP) bangdak lenirtemi kobi melii Jammu & Kashmir nung Hindu nunger ka chief minister ser pa leniba kübok sorkar akumtsü olen ka jembiogo, iba denji külemi Centre-i Jammu & Kashmir Angh, N N Vohra melentsü atema nübo ka bushidar, ta osang angazüker.
Rogonü New Delhi nung aliba BJP headquarters nung BJP National Tir, Amit Shah leniba nung party lenirtemi Mookerjee nem akhüm agüja liasü.
Tang Jammu & Kashmir ya Angh yimsüsüba kübok lir. BJP-i Peoples’ Democratic Party (PDP) teloktep sorkar toktsüba sülen Chief Minister, Mehbooba Mufti-i la menden toktsütsüsa akum.
Party osang ajanga ashiba agi, temeshi aini aoba, Amarnath Yatra tembangba sülen taruba ita tatemlen BJP-i Jammu & Kashmir nung sorkar akumtsü atema inyakdar.
J&K assembly nung menden 87 lir, aser iba nungjagi BJP MLA 25, PDP MLA 28, National Conference 15, Congress Party MLA 12 aser party tilatem nungi MLA 7 lir. Ajisüaka PDP nung telemsa adoka party MLA kari BJP yari nungang BJP-i sorkar kümtettsüsa lir, aser tang PDP telung nung mangatettep adoka lir.
Jammu & Kashmir nungbo assembly kümsük ya küm trok lir aser tesüsabuba state assembly election ji 2014 küm Luchii/December ita nung agia liasü.