J&K nung Hizbul telok nung kiralongrar ana kahset, ana apu

Srinagar, March 26 (Agencies): Deobarnü tatalokba balala nung Jammu & Kashmir nung Hizbul kiralongrar ana khaset aser ana apu.
Pulwama district kübok Padgampora tesem nung police temi mita bushiba mapang kiralongrartemi police tem dak akah.
Kiralongrartem ya tesülen nungi gari ka nung arur police indang gari tesüba dak akah tenzük, ta police osang ajanga ashi.
Kiralongrar kahseter rongnung ka Shahbaz Safi Wani (Rayees Kachru), ta jangjaogo aser pa ya iba tesem nung 2016 küm June ita nungi tenzüka kiralongraba mapa nung shilem agia liasü.
Kiralongrar tanabuba kahsetsang ya Farooq Ahmed Hurrah, ta jangjaogo aser pa ya 2010 küm ‘surrender’ sür ‘parole’ nung liasü.
Tena mener aruba gari anisangbo jena ao aser pa aputsü bushidar, ta osang ajanga ashi.
Deobarnü Baramulla nung aliba Tawi apu nung police kati bena aliba AK-47 rifle ka rakzüktsü merangba mapang kiralongrar ana apu aser ka jena ao.
“Kashmir Valley nung alir anati prangpong rakzüktsü merangba mapang onoki nisung ana pua lir,” ta Jammu Zone indang Inspector General of Police, S.D. Singh Jamwal-i osangbener dang ashi.
Iba lendong nung police, Muhammad Hanief yiru aser anasa aliba mozüki kati anir ao.
Hanief ya tamanger telok, Anjuman-e-Minhaj-e-Rasoolnung mendenpuba, Maulana Dehlavi tanüker liasü.
Iba lendong nung prangpong rakzüka bener ajensang ya bushiba mapang lir. Par asemprong ya Hizbul telok den tesendaktep lir, ta temolung malemer.