J&K nung Hokolbar nikongdang nungi Angh yimsüsüba arutsü akok

Jammu, January 8 (Agencies): Peoples Democratic Party (PDP) Tir Mehbooba Mufti-i tebu, asür chief minister mangyim anogo pezünü mabensa tashi chief minister atema tenangzükba agitsü atsü ayongba ajanga Hokolbar nikongdang nungi Jammu & Kashmir nung Angh yimsüsüba arutsü akok, ta osang ka ajanga metetdaktsü.
“Mapang agi ya tashi ang bentsür aruba ajanga state assembly-i telemtetba ka magütsü tashi Angh, N.N. Vohra-i state nung Angh yimsüsüba benoktsü,” ta Raj Bhavan sangdong ka ajanga IANS dang ashi.
Angh yimsüsüba osang tejangja Hokolbar nikongdang tashi nung metetdaktsütsü aser state temzüng nung mela aliba ama chief minister tasen ka meshimtet tashi state assembly mali amai pai yimsü süa atatsü.
Party nung lenir kari ajungshiaka PDP tekolak la, Mehbooba Mufti-i tebu, Mufti Mohammad Sayeed mangyim anogo pezünü abensaba anogo, Deobarnü tashi lai chief minister atema tenangzükba agitsü atsü ayonger, ta PDP-i IANS dang ashi.
Bharatiya Janata Party nung tongti tezülur Ram Madhav aser BJP Rajya Sabha züngsem Avinash Rai Khanna na Srinagar tongogo. Ram Madhav ya Jammu & Kashmir nung party ketdangser ka lir.
“Madhav-i Gupkar Road nung asür chief minister aliba official ki semdanga pai anünga yutsüba kinüngertem den asüko lemsatepogo,” ta state BJP nung otongdar Khalid Jahangir-i metetdaktsü.
Centre nungi BJP lenirtema Mehbooba Mufti chief minister shimtsü asoshi state party aser MLA tem Hokolbar nikongdang amentsü aliba senden nung adentsü sentong yanglua lir.