J&K nung kiralongrartemi CRPF jawan 8 kahset

Srinagar, June 25 (Agencies) : Honibar nikongtsütsü Jammu & Kashmir kübok Frestbal tesem nung kiralongrartemi Central Reserve Police Force (CRPF) bus ka amakdang jawan 8 kahset.
Srinagar-Jammu National Highway nung atalokba lendong nung 161 battalion nungi jawan 8 kahset aser parnok 21 yirua lir. Yirua alirtem rongnung par pezü kanga mejungi lir, ta CRPF ketdangser kati ashi.
Iba mapang CRPF sepaitemia kiralongrar ana kahset, ajisüaka kiralongrartem gari ka nung liasü aser nisung anabo jena otet, ta paisa ashi.
“Kiralongrar ana kahsetogo. Yirua aliba CRPF sepaitem mozükidangi anir ogo” ta force commandant Rajesh Yadav-i metetdaktsü.
“CRPF jawan temji firing range practice temer tesepi meyipa aodang kiralongrartemi len tom nung parnok amak. Jawan temi kiralongrar den kahtep aser idangji ana kahset” ta Yadav-isa shisem.
CRPF Inspector General Nalin Prabhat-i ashiba agi, kiralongrar anaji Pakistan nunger ama repranger aser Lashkar-e-Toiba nung züngsemtem asütsü akok.
Tasür kiralongrar ana ket nungi AK-47 Rifle 2 aser hand grenades 11 ngutetogo. Iba osang ya CRPF Director General Durga Prasad-i Home Minister Rajnath Singh den lemsatepogo.
“Iba lendong nung jawan aika taküm laluogo aser iba atema süoki ia bilemer” ta Minister of State for Home Affairs Kiren Rijiju-ia metetdaktsü.
“Kanga dang tesasatsü lendong ka atalokogo aser kanga junga bushisüngdangtsü” ta Rijiju-i New Delhi nung osangbener dang ashi.