J&K nung lenirtem chiokdar: MHA

New Delhi, November 15 (Agencies): Hokolbarnü Union home ministry ketdangsertemi Parliament House anaprong nung MP tem dang, Union territory of Jammu & Kashmir nung tensa süngjemdar aser pua aliba yimtenren lenirtem ka khen, ka khen ta chiokdar, ajisüaka lenir ajak chiokmatsü atema mapangbo atakzüka meshitettsü, ta metetdaktsüogo.
Congress lenir Anand Sharma-i aniba Parliamentary Standing Committee on Home Affairs senden nung MP temi Union Home Secretary, Ajay Kumar Bhalla den ketdangsertem dang Jammu & Kashmir Union territory nung tensa indang asüngdangba den külemi tensa süngjemtsü atema kechi inyakdar, ta asüngdang.
Taküm August 5 nü Centre sorkari J&K nung Arrla 370 agienba sülenbo tang mezüng Parliamentary Standing Committee on Home Affairs senden amener.
Senden nung home secretary-i MP tem dang, Jammu & Kashmir nung tensa süngjemdar, school tem lapokogo aser apple shishilembaba tenzükogo, ta metetdaktsü. Home ministry ketdangsertemisa, Public Safety Act (PSA) kübok pua aliba lenirtemi parnok pua ayuba anema ken o agütsütettsü, mesüra high court nung ken o benoktettsü, ta ashi.
Tang PSA kübok pua alirtem rongnung taoba mapang chief minister tem- Farooq Abdullah, Omar Abdullah aser Mehbooba Mufti nunger densema lir.
Internet nokdangba dak sendakba nung ketdangsertemi, kiralongrartemi mapa tamajung inyaktsü atema internet amshiba aser nisung tamajungertemi olulu prokba agi internet nokdanger, ta ashi.