J&K nung mezüngbuba tetsür CM, Mehbooba asütsü

Srinagar, March 24 (Agencies): Brihostibarnü Peoples Democratic Party (PDP)-i Mehbooba Mufti legislature party lenir shimogo, aser ibaji ajanga state sorkar akümtsü maparen tembanger.
La shimba sülen lai, “Ni nenok ajak dang pelaba lemsatepner. Nenoki nungitbaji kü tashi. Tesüiba ita asem nung nüburtemi kanga nungitogo,” ta ashi.
Tang mezüng Jammu & Kashmir nung testür chief minister atema tenangzükba agitsü alila, Mehbooba leniba nung tanü nikongdang 4:00 ako meta nungi tenzüka lar kidang legislature party senden amen.
Ano külen BJP-ia, Hokolbar nü MLA tem senden amenba sülen sorkar akümtsü atema telemtetba agitsü, ta ashi.
PMO nung minister of state, Jitendra Singh-i, “Ozü party-i tali akhangba mali. Teloktep (BJP-PDP) akümba onüktem kasa dang lir,” ta ashi.
Yaküm March ita nungi tenzüka PDP-BJP teloktepi ita 10 state yimsüsüba sülen January 7, 2016 nü Mehbooba tebu aser Chief Minister, Mufti Mohammad Sayeed ajungbena asüba sülen January 8 nü state nung Angh yimsüsüba liasü.
Mongolbarnü Mehbooba-i Delhi nung Ato kilonser, Narendra Modi ajurua senden amenba sülen lai iba senden kanga junga kaogo ta metetdakja liasü.