J&K nung nashi shi nokdangba ita ana agiener

Jammu, October 05 (Agencies): Jammu & Kashmir nung nashi shi nokdangba ajanga lungkak aita mepetmesü adokba sülen Supreme Court (SC)-i state nung nashi shi nokdangba ita ana agientsü tuyuogo.

Taoba ita state High Court, Jammu bench-i state police dang state nung nashi shi tepsetba aser ayokba nokdangba ozüng benokang ta tuyua liasü. Iba sülen hopta ka shi lir Srinagar high court bench-i iba tenokdangbaji agientsüla ta mepishia liasü.

Tanü Supreme Court-i High Court Chief Justice dang iba onük reprangshimtsü aser tekaraba nung telemtetba tajung ka dangi arutsü atema obendanger asemi akümba Bench ka tentetang, ta tuyuogo.

“Tetuyuba ana lir aser ibaji High Court Chief Justice-i obendanger asemi akümba Bench ka ajanga inyaktsü,” ta Chief Justice of India-i ashi.

High Court-i police dang state nung nashi shi tepsetba aser ayokba nokdangtsü benokang ta tuyuba sülen state nung lungkak sashia aitba ajanga Muslim nunger benjung, Eid mapang state tesem ajaklen anogo asemnü internet shibangtsüsa aküm.