J&K nung Pak nunger kiralongrar ka apu

August 05 nü Jammu & Kashmir, kübok Udhampur nung taküm apuba kiralongrar ka yangi angur.

Udhampur, August 05 (Agencies): Tanep Jammu & Kashmir, Udhampur anasa Narsoo Nallah nung aliba Jammu-Srinagar highway nung kiralongrartemi BSF sepaitem amakba mapang kiralongrar ka kahset aser ka taküm puogo.
Tang pua alisangji Pakistan, Faisalabad, Ghulam Mohammadabad nung alir Mohammed Naved lir ta jangjaogo.
2008 küm Mumbai amaker kiralongrar Pakistan nunger Ajmal Kasab apuba sülenbo tang mezüng Pakistan nunger kiralongrar ka apur lir.
BSF sepaitemi kahsetsangji Pakistan, Bhawalpur nungi Momin Khan lir ta Naved-i shiogo.
Tanep 7:30 ako nung kiralongrar asemi BSF sepai amakba mapang sepai ana kahset aser 11 yirutsü. Iba rara nungsa kiralongrar ka asü aser ana Chirdi yimtsüngleni jena ao, saka tesülen kabo apu.
“Kiralongrar sangji school ki ka nung apu. Pai apuba nisungtem jagi pa apu, iba den pa apuba nung VDC züngsem kari-a yarisem,” ta Udhampur Deputy Commissioner, Shahid Iqbal Choudhary-i ashi.
Osangbenertem den jembidang Javed-i, “Hindu nunger tepsettsü atema ni aru. Mapang ajak nung Kashmiri nungerbo tepseter,” ta ashi.
“Ni yangi arur anogo 12 jungogo. Ni Pakistan nungi lir aser kahtepba mapang kü tembar asü saka nibo jentet. Ni asü asübo, ibaji Allah mapa südi. Iba ya inyaktsü nung jangratem lir,” ta Naved-isa ashi.
Tamasabo pai pa arishi küm 20 tema ta ashi saka tesülen pa arishi küm 16 lir ta ashi.
LeT kiralongrar teloki J&K-i lanurtem yokba mapang, parnok ji tanurtem (juveniles) ta züngshitsü asoshi arishi küm 18 tekübok lir ta ashitsüla, ta tuyua lir.