J&K nung PDP-i NC, Congress den lokteper sorkar akumtsü

Srinagar/New Delhi, Yimpoksüi/November 21 (Agencies): Tanü PDP lenir, Altaf Bukhari-i, par party-i National Conference aser Congress Party den lokteper Jammu & Kashmir nung sorkar akumtsü, ta metetdaktsü.
Srinagar nung osangbenertem den jembidang PDP leniri, “Kobi melii nenoki osangtajung ka angashitsü,” ta metetdaktsü.
“Ozü bangdak lenirtemi party asem (Congress, PDP aser NC) lokteptsü melungogo aser state yimtenren den legal maitsü nungittsü melungogo. Kobi melii nenoki osangtajung ka angashitsü,” ta metetdaktsü.
PDP lenirisa, iba teloktepji Assembly nung MLA 60-i nungittsü, ta ashi.
Tang Jammu & Kashmir Assembly nung PDP MLA 28, National Conference MLA 15 aser Congress MLA 12 lir.
Ano assembly nung Bharatiya Janata Party (BJP) MLA 25 aser independent MLA tenet lir.
Congress lenir aser taoba mapang Jammu & Kashmir chief minister, Ghulam Nabi Azad-i, party asemi lokteptsü atema jembidar, ta metetdaktsüba sülen kobi melii PDP leniri iba osang ya metetdaktsür.
Azad-i, “Party ajaki teka amteper state nung sorkar akumtsü atema bilemdar. Tang iba atemaji tejembidak lir,” ta metetdakja liasü.
National Conference telung osang ka ajanga ashiba agi, NC-i teloktep sorkar nung medenner, ajisüaka PDP-Congress teloktepbo pusemtsü, ta metetdaktsü.
Taküm June 6 nü BJP-i Peoples Democratic Party den teloktep raksaba sülen sorkar chirepa liasü, iba sülen tang state nung ita trok (December 19 tashi) Governor’s rule benoka lir.