J&K nung rara adoka nisung 11 asü

Srinagar, Luchii/December 15 (Agencies): Tanep Jammu & Kashmir kübok Pulwama district nung rara adoka nisung 11 tashi süogo; security sepaitemi Sirnoo yim longbanga telungpurtem mita aoba mapang nung rara tenzüka liasü.
Iba rara nung telungpur asem den sepai ka asü, ta police-i metetdaktsü.
Iba rara anenba sülen nüburtem adenshir longkak aita security sepaitem den rara tenzük, ibayongji sepaitemi prangpong aser pellets amshitsüsa akum.
Iba mapang nungji lanur ana- Amir Ahmad aser Abid Hussain na prangpong agi khaset. Ano longkak aiter nisung pezü mejungi yiruba sülen tesülen asü, ta ketdangsertemi metetdaktsü.
Ano longkak aiter kata yirua Srinagar nung aliba hospital ka nung yaridang asü, iba dak alia iba rara nung longkak aiter nisung 35 yiru aser parnok rongnung nisung asembo kanga mejungi yirua lir.
Ketdangsertemi Pulwama jila nung curfew ozüng benokogo aser sepai tali lemzüktsüogo.
Iba dak alia district nung Mobile internet services shibantsüogo aser Kashmir Valley o Bannihal town na tsüngda railway services thinenja liasü.
Iba osang angashia taoba Chief Minister Omar Abdullah-i twitter ajanga, “Ano Kashmir nung azü tokshiogo. Longkak aiter trok tepset, sepai ka asü. Tanep telungpur asem asüba densema nisung 10 süogo,” ta shia Angh, Satya Pal Malik aitsü.