J&K nung rara adoka nisung 11 asü

Srinagar, July 09 (Agencies): Yashi sepaitemi Jammu & Kashmir nung Hizbul Mujahideen commander, Burhan Muzaffar Wani tepsetba sülen tanü Kashmir nungertemi longkak aita security sepaitem den raradang tajemba agi nisung 11 süogo.
Tanü Wani asüpila sentong nung adentsü atema Kashmir Valley nung nisung merirjang aika adenshiba sülen longkak ait tenzük, aser iba mapang nung longkak aitertemi Kulgam nung BJP party office ka dena amak.
Iba dak sentakba nung Congress-i, nüburtemi kiralongrartem atema mang mayimtsüla, ta shiogo.
Tanü Wani tasümang pa tasoyim, Tral (Pulwama district) nung aremdang curfew ozüng alema nisung 20,000 tashi adenshia liasü.
Sepaitem aser longkak aitertem tsüngda raradang nisung 11 asüba den külemi security sepai densema nisung 120 dak tema yiruogo.
Lanurtemi Bandipora, Qazigund aser Larnoo nung aliba police post aser police station tem nung lung agi aon. Iba den külemi Baramulla district kübok Sheeri, Kreeri, Delina, Pattan aser Palhalan tesemtem nunga sepaitem den raratepa liasü.
Tensa majungba ajanga ketdangsertemi temeshi aini aoba ‘Amarnath Yatra’ thinentsüogo aser sorkari Kashmir Valley nung mobile Internet services anentsüogo, iba den külemi tesem kar nungbo curfew ozüng mesükba ozüngtem benokogo.
Yashi Anantnag district nung police aser army senteper telungpur den raradang Wani den par züngsem ana kahseta liasü.
Arishi küm 21 Wani ya Kashmir telungpur rara nung tan puto lenir ta züngshia liasü.
Wani ya headmaster jabaso ka liasü aser 2010 küm pai school doktsür Hizbul Muhahideen telok nung aden. Pa tepseter nem sen lakh 10 senpet agütsütsü sangdonga liasü.