J&K nung RSS indang mezüngbiuba senden amentsü

New Delhi, May 16 (Agencies): Kashmir nung mepetmesü liaka, RSS-i tang mezüng atema Jammu nung annual review meeting alitsü telemtetba agiogo.
Senden ji Jammu nung ayonga agitsü aser iba ya ajanga telungpurtem dang J&K ji India kübok tongti shilem ka lir ta sayutsü.
July 18-20 tashi amentsü aliba senden nung Rashtriya Swayamsevak Sangh (RSS) tanishir Mohan Bhagwat, BJP tir Amit Shah aser VHP lennirtem aika adentsü, ta Sangh osang ka ajanga metetdaktsü.
“Kashmir lenden nung telungpurtem dang iba tesem ya India kübok shilem ka lir ta sangoktsütsü aser Sangh-i telongjem atema inyaker ta ashitsü atema sendenji amentsü” ta parnokisa shisem.
“Iba ya prant parcharks (state publicity officers) indang annual review meeting lir” ta RSS lennir, Manmohan Vaidya-i ashi.
Jammu nung aliba regional office-i iba senden amentsü asüngdangba sülen telemtetba agi, ta Vaidya-isa shisem.
“Taoba mapang Jammu nung onok indang office tila ka dang liasü saka tesüiba küm ishika tsüngda tuluba kümogo” ta paisa metetdaktsü.