J&K nung sorkar mapa 50,000 adokdaktsütsü: Satya Pal Malik

Srinagar, Luroi/August 28 (Agencies): Tawa tasen tentetba Union Territory, Jammu and Kashmir nung mapa manguba tebilemtsü ajema kümdaktsütsü atema Centre sorkari taruba ita 2-3 tsüngda sorkar mapa tasen 50,000 aadokdaktsütsü, ta tanü Angh, Satya Pal Malik-i metetdaktsü.
Tang Jammu & Kashmir nung, talisa Kashmir nung tensa azüokteta lir aser Arrla 370 den Arrla 35A agienba sülen nisung asüba mesüra kiojen raksaba tatalokba mali, ta paisa metetdaktsü.
J&K nung shisaliok jenjang tajungba akümtsü nüngdak, ta shia Malik-i, kobi melii Union Territory nung college 50 lapoktsü, aser iba nungji tetsür temeja colleges densema lir, ta metetdaktsü.
“J&K nung primary school 3000 aser middle school 1000 lapoka lir. Ladakh nung schools aser college ajak junga odar. District shia nung industrial training institute (ITI) kaka amenoktsü,” ta Malik-i ashi.
Kar tajangzük angutsü atema olulu kanga prokdar, ta shia Malik-i, tesem nung mozü densema chiyungtsü agi manünger, ta ashi.
J&K nung sepai aika lemzükja aliba aser tenokdangbatem benoka aliba dak sendakba nung Malik-i, Indian army anema nüburtem apusodaktsütsü atema Pakistan-i olulu proktsü asoshi mobile aser internet amshir, ajisüaka tanemtanemi mobile aser Internet tenokdangbatem agientsü, ta ashi.
Kobi melii Jammu & Kashmir ya terenlok lenmang nung jajatsü, ta shia Malik-i, J&K nung terenlok kanga aliba ngur Pakistan-occupied-Kashmir (PoK) nung alirtemia India den dennütsü, ta ashi.
Srinagar nung osangbenertem den jembidang Malik-i, Centre nung Narendra Modi-i aniba sorkari agiba telemtetba nung ashishiteptsü menüngdak, kechiyong tarutsü Jammu & Kashmir atema jembiba tajungba asütsü, ta ashi.