J&K nung yimtenren party tem den jembitsü melunga lir: Centre

New Delhi, April 28 (Agencies): Hokolbarnü Centre sorkari Supreme Court (SC) dang, Jammu & Kashmir nung tang tensa bentettsü atema state nung recognised yimtenren party tem den ken o jembitsü sorkari melunga lir, ajisüaka separatists denbo ken o mejembitsü, ta metetdaktsü.
Attorney General (AG), Mukul Rohatgi-i, recognised party temi ken o jembiba nung shilem agitsü melungra ken o jembitsü, saka separatist denbo mejembitsü, ta ashi.
Jammu & Kashmir High Court Bar Association-i, Centre sorkari Kashmir tensa bentettsü atema mera agia meinyaker ta jembibaji tiyazü, ta Attorney General-i Chief Justice J. S. Khehar, justices D.Y. Chandrachud aser S.K. Kaul nungeri akumba bench dang ashi.
Rohatgi-isa, tawa Ato kilonser, Narendra Modi aser Jammu & Kashmir Chief Minister, Mehbooba Mufti na senden ka mena state tensa indang jembiogo, ta metetdaktsü.
SC bench-i Jammu & Kashmir High Court Bar Association danga, state tensa süngjemtsü atema May 9, 2017 nü tashi nung tebilemba onüktem benokang, ta tuyuogo.
Bench-isa bar association dang, Kashmir nung tensa süngjemtsü atema nenoki asalentong kar benokba ajanga tongtibang shilem ka agitettsü, ta ashi.