J&K Oppn MLA temi Rahul den ajurutep

New Delhi, August 21 (Agencies) : Deobarnü Jammu & Kashmir opposition lenirtemi linük Congress Tatong Tir Rahul Gandhi den ajurutepa tang Kashmir tenemtsüng tensa mejungi aliba tebilemtsü azüoktsü atema olemtepa liasü.
Tarur rongnung tesüiba mapang Jammu & Kashmir Chief Minister Omar Abdullah-a densema liasü.
Kashmir tebilemtsü atema linük rangbeni shishia bilemtsütsü nüngdak, ta Rahul Gandhi den ajurutepba sülen parnok rongnung kati osangbenertem dang ashi.
“Kashmir tensa kangasa mejungi kümogo, ya tebilemtsü ulura. Linük rangbeni Jammu & Kashmir nung tenük yoka yaritsüla,” ta ashidang kasa yimsüsüri, iba animesüngzüktet tia koktettsü atema linük nung opposition teloktem longjemer lenmang ka bushitsüla, ta shisem.
Iba kasa telok yagi linük Tir Pranab Mukherjee den Honibarnü ajurutepa liasü aser iba mapang parnoki, Kashmir nung political tebilemtsü ka agi tonga lir aser ibaji state ketdangsertem kijaibo mokoktettsü ta tir dang ashi.