J&K, RS Pura Sector nung Pak sepaitem nisung 3 tepset

Jammu, August 28, 2015: Pakistan-India arrtsülen Pakistan sepaitemi yirutsüba nisung ka Jammu & Kashmir, Jammu nung aliba Government Medical College hospital-i ambulance gari ka nung bener aruba noksa nung angur. Osang ajanga angazükba agi Pakistan sepaitemi injang aser bomb yokba lendong nung nisung asem süogo aser nisung ti tashi yiruogo.

Jammu, August 28 (Agencies): Jammu & Kashmir nung Pakistan sepaitemi maneni ceasefire alema injang aser bomb yokdang RS Pura Sector nung nisung asem tepsetogo aser nisung ti yirutsüogo.

Hokolbar nü Border Security Force (BSF) otongdar kati, “Yasüng ayaterm nungi tenzüka Pakistan Ranger temi injang sashi kahtokogo. Tetenzüklenbo injang dang amshi saka tesülenbo R S Pura aser Arnia sector tem nung aliba BSF post tem aser nüburtem alitak mortar bomb yok,” ta ashi.

Kishanpur nung aliba International border (IB), Jora Form, Jugnu Chak, Nawapind, harna, Sia, Abdullian aser Chandu Chak tesemtem nung tanep 1:45 ako meta nungi tenzüka parnoki injang aser bomb yok, ta police ketdangser kati ashi.

Pakistan sepaitem jagi mortar bomb aika kahtok aser automatic prangpong amshia injang yok. Bomb temji International arrtsü nungi talangka pilar aliba yimtsüngtem nunga yok, ta ketdangsrisa ashi.

Iba sülen BSF sepaitemia injang yok, aser tang osang angu tashi nunga Pakistan aser India sepaitem tsüngda kahtepdagi, ta parnokisa ashi.

2003 küm ceasefire tezüngzüktep agiba sülen taküm August ita kija nunga Pakistan-i cease fire temzüng alema 55 ben tashi inyakogo aser taküm küm tang tashi nung ceasefire temzüng alema 245 ben tashi inyakogo.