J&K semdanger telok, APD senden amen

New Delhi, September 07 (Agencies): Tawa Jammu & Kashmir semdangba telok-All Party Delegation (APD)-i, sorkari state nung stakeholders ajak den ken o jembi tenzüktsüla, ta ashi.
Party ajak nungi teshimtet lenirtem, APD-i September 4-5 anogotem nung J&K semdanga liasü, aser tanü ghonda asem senden amendang parnoki sorkar dang, India-Pakistan ken o jembiba asentenshia tenzüktsüla, koba ajanga Kashmir nung tesünep bener arutettsü, ta ashi.
Union Home Minister Rajnath Singh leniba nung iba senden amendang pai, linük jenjang majungtsüsa süra kecha nunga atsü-anem masütsü, ta ashi.
Yimtenren party tem nungi lenirtemisa state nüburtem dang rara anentsüla, aser onük ajak ken o jembiba aser o lemtepba lenmang ajanga dang latettsüla, ta ashi.
Iba senden nung bangzüng renemba metetdakja Minister of State in PMO, Jitendra Singh-i, “Tangatetba lokti ka nung raratsü tesem mali ta telok züngsemtemi lemtetogo,” ta ashi.
Bangzüng nungsa Centre aser J&K sorkar lenirtem dang, stakeholders ajak den ken o jembi tenzüktsüla ta lemtet.
Ano Left Party temibo India-Pakistan ken o jembiba asentenshir tenzüktsüla aser nisungtem aliba tesemtem nungi AFSPA ozüng agientsüla, ta shiogo.
CPI-M General Secretary, Sitaram Yechury-i ashiba agi, Mehbooba Mufti-i aniba Jammu & Kashmir sorkari inyaktetbatem indang kecha mejembi, ajisüaka All India Majlis-e-Ittehadul Muslimeen (AIMIM) lenir, Asaduddin Owaisi-i, tang tensa ya PDP-BJP teloktep sorkari mazüoktet, koba ajanga tang tashi tesünep mali, ta nija tebilemba ka jembi.
Yechury-isa, “Tang mapang ya tai tongloktsüteptsü mapang ka masü. Tang mapang ya Kashmir nung tesünep alitsü atema longjemer inyaktsü mapang ka lir,” ta ashi.
APD senden nung Owaisi-i, BJP aser Congress nung madenba party temi akumba telok kati Jammu & Kashmir semdanga kulitem bushisüngdangtsüla, ta takhangba agütsü.
Kashmir nung ozüng alema tepoukdak yoka alirtem chioktsüla ta takhangba agüja AIMIM lenirisa, Union Home Minister-i Kashmir nung tongtibang osangkaket pezü nungi yimobilem zülurtem ajurua jembitsüla, ta ashi.
APD-isa sorkar dang state nung senso ajak kümzüka alitsü atema mera takang kar agitsüla aser longkak aitba mapang yirua alirtem nem medical teyari agütsütsüla, ta takhangba ka agütsüogo.