J&K, Shopian nung telungpurtemi police ketdangser ka khaset

Srinagar (Jammu & Kashmir), March 16 (Agencies): Tanü Jammu & Kashmir nung Shopian district kübok Vehil tesem nung mejangjaba telungpurtemi Special Police Officer (SPO) tetsür ka khasetogo, ta osang ka ajanga metetdaktsü.
Ketdangsertem osang ajanga ashiba agi, tanü nikongdang 2:40 ako meta Vehil yimdak Khushboo Jan’er kima mejangjaba telungpurtemi la dak injang khaloktsü.
Iba tatalokba sülen Police-i ken o ka benokogo aser bushisüngdang tenzükogo.
Police-i, “Tanü kiralongrartemi Shopian district kübok Vehil yimdak tetsür police ketdangser, Khushboo Jan dak injang khaloktsü. La kanga mejungi yirua hospital kati anir ao saka süadok. Onoki kiralongra mapa ya aitsür aser iba ama mapang nung lar kibong nungiter,” ta metetdaktsü.
Police-isa, “Iba tatalokba nung injang agi Khushboo mejungi yiruba sülen anasa aliba hospital kati la anir ao saka süadok,” ta ashi.
Osangbener den jembidang police ketdangser kati, “La police department nung SPO teinyakdak liasü,” ta metetdaktsü.
Army, Special Operation Group, Police aser CRPF-i iba tesemji longbanger telungpurtemi mita odar.
Jammu & Kashmir kübok Poonch district nung Pakistan-i ceasefire ozüng alema inyakba mapang ka nung tanü iba ya atalokogo. Pakistan sepaitemi iba district kübok Mankote sector tesem aika nung injang sashia khaloktsü.
February ita nung kiralongrartemi Pulwama nung CRPF sepaitem amakba sülen nungi Kashmir nung tensa mejungi arudar.
Kashmir nung security sepaitem kanga yakyaka liaka tesem nung yimjung raksatsütsü atema telungpurtemi sepaitem maneni tepseta arudar.