J&K sorkar atema Mehbooba nem mapang agütsütsüla: Abdullah

Jammu, February 14 (Agencies): Tanü National Conference (NC) tongti lenir, Farooq Abdullah-i, Jammu & Kashmir nung sorkar akumtsü atema telemtetba agitsü asoshi PDP tongti lenir, Mehbooba Mufti nem ano mapang agütsütsüla, ta ashi.
Mehbooba tebu aser chief minister, Mufti Mohammed Sayeed asüba sülen tang J&K ya Angh yimsüsüba kübok lir.
Delhi Gymkhana Club indang tang mezüngbuba ‘Literature and Ideas’ festival nung jembidang taoba chief minister Abdullah-i, “Asüng kechi ataloktsü’ar shingaia memetet; la nem mapang peria agidakjang, tetsürtemi teti agia mapang agir, aiben parnoki mapang peria aginer,” ta ashi.
Mehbooba tebu Mufti taküm January 7 nü New Delhi nung asüba sülen mangyimba mapang lai chief minister menden atema tenangzükba agitsü memelungi liasü, ibayongji tang state nung Angh yimsüsüba lir.
BJP aser PDP teloktep nung tang PDP tongti Mehbooba-i sorkar akümtsü telemtetba magiteti lir. Lai, party ana lokteptsü atema lemtetba onüktem atema Centre sorkari mera agia inyaktsüla ta akhanger.
Abdullah-isa, “Asenoki atadi aser la nungitdi; la nem mapang agütsüra aser asenoki nungitra lai junga inyaktsü. Iba sülen kechi inyaktsü’ar asenoki lemtettsü,” ta ashi.
Paisa, “State kümzüka ayutsü aser longjema aliba ajanga linük tashi itdaktsütsüji nüngdak, kechiyong linük kongsang ka tashi meiti lira linük taküm melitettsü,” ta ashi.