J&K Speaker mejaokra India-i CPA sen nung madentsü

New Delhi, August 07 (Agencies): Pakistan nung Commonwealth Parliamentary Association (CPA) senden alidang Jammu & Kashmir Assembly nungi speaker mejaokra India-i mokdangtsü, ta Hokolbar nü Lok Sabha Speaker Sumitra Mahajan-i metetdaktsüogo.
State nung kiralongra mapa anaben atalokba aser aiben ceasefire anema benshiba sülen iba telemtetba ya agigo.
Iba senden ya September 30 nungi tenzüka anogo 10 tashi Islamabad nung akatsü sentong lir.
“Pakistan-i CPA senden nung J&K nungi speaker mejaokra India-i mokdangtsü ta onok ajak tanü ajurutepba mapang lemtetogo, senden akatsü aliba tesemji memelenshira onok madentsü,” ta Mahajan-i ashi.
CPA nung tekolakji Britain nungi lir, saka senden nung adentsü pur jaoktsü atemajibo tayonger linük dak keta lir.
Aji oda süaka Pakistan-i Jammu & Kashmir ya mangatettep aliba alinük asüba agi züngdok ta shiogo.
“Parnoki alemli latetba kar enoksemer Jammu & Kashmir mejaoktsü osang UN General Assembly dangi yokogo,” ta Mahajan-isa ashi.
Pakistan-i iba telemtetba agiba ajanga India jashidaktsüogo, kechiba süra J&K state ji India nungi kodanga pilatsü makokba state ka lir aser Pakistan telemtetbaji magizüker, ta Mahajan-i shisem.