J&K tensa atema Angh, Vohra-i party ajak senden ayongzük

Srinagar, Aami/June 22 (Agencies): Tanü Jammu & Kashmir Angh, N. N. Vohra-i tang state tensa asadangtsü atema party ajak ayongzüka senden ka menogo.
Raj Bhavan nung ayongzükba senden nungji Jammu & Kashmir nung yimtenren party balala nungi tongti lenirtem aser züngsemtem dena liasü.
National Conference (NC) tatong Tir, Omar Abdullah-i party tenüng nung aden aser PDP nungi general secretary, Dilawar Mir aden.
Tanep PDP tongti aser taoba chief minister, Mehbooba Mufti-ia Angh, Vohra ajurua state nung terenlok dak sendakba onüktem nung o lemtepa liasü.
People’s Democratic Party (PDP) Tir, Mehbooba-i Raj Bhavan nung Angh ajurua la Chief Minister inyakba mapang nung tembanga meinyaktetba terenlok mapatem indang metetdakja item atemaji tekaraba nung telemtetba agitsü asoshi Angh dang mepishi, ta PDP otongdar kati metetdaktsü.
Angh-ia taoba chief minister dang state nung tensa süngjemtsü atema yimtenren party ajak aser lokti tentettemi longjemer inyaktsüla, ta metetdakja liasü, ta otongdarisa metetdaktsü.
BJP-i PDP den teloktep raksaba sülen Chief Minister, Mehbooba-i la menden toktsü, iba sülen tang state nung Governor’s rule benoka lir.