J&K ya India shilem: Venkaiah Naidu

Kolkata, August 16 (Agencies): Hokolbarnü linük tatong Tir, M Venkaiah Naidu-i, Jammu & Kashmir ya India shilem ka lir aser India shilemsa asütsü, ta metetdaktsü.
Paisa, ajaki yimtenren tangatetba balala toktsür linük security onük atema longjemtsüla, ta ashi.
Tanep Venkaiah Naidu-i West Bengal kübok Santiniketan nung aliba Visva-Bharati University semdanga ‘Shyamali’ building semzükja liasü.
Yashi Ato kilonser, Narendra Modi-i linük nütsüng tali arenba atema tebilemtsü kaa jembiba onük lemsatepa Naidu-i, chiyungtsü security atema India nungeri bendanglen nungi bener aruba nung meimlatsüla, ta ashi.
“Nüchiso anguba sülen küm 72 jungogo, asenoki shisadangtsüla. Nütsüng timba aliba linük rongnung asenok densema lir, ajisüaka asenok ali mali. India ama linük ka nung asenoki chiyungtsü security atema bendanglen nungi bener aruba nung meimlatsüla. Asenoki asen linük nung züsentetba chiyungtsü nüngdaker. Asenoki nütsüng azüoktsüla,” ta ashi.
Taoba mapang Ato kilonser, Atal Bihari Vajpayee sür küm ka ajungba anogomong nung Venkaiah Naidu-i, “Temelenshibatem mapa küma inyak tenzükbaji Atal yimsüsüba mapang nung liasü. Pa yimsüsüba kübok alima linüktemi India akhümtsübu tenzük,” ta ashi.
Tanep Naidu-i, pa densema linüki taoba mapang Ato kilonser, AB Vajpayee bilemteta akhüm agütsür, ta metetdakja liasü.