JKM-i tarutsü nükla nung pangzüng pongu latet

Mokokchung, January 21 (TYO): January 13 nungi 15 nü tashi Satsükba yimtak 69 buba Japukong Kaketshir Mungdang (JKM) lokti senden ‘Tarutsü Nükla) omen nung kanga takok ngua kaogo. Iba mungdang nung Japukong kübok yimtsüng 12 aser jila balala nung Unit tem nungi tejaoker 500 dak tema denogo.
Mokokchung jila nungi kilometer 50 shi pilar aliba Satsükba yimtak akaba mungdang nung tongtibang nisungtem, tejaokertem, kaketshir lenirtem densema aika denogo. Anogo asemnü mungdang nung JKM-i tarutsü nükla nung pangzüng pungu lateta ayu.
JKM-i, küm asemshia aliba JKM general conference ji Yajang ‘C’ nungi tenzükshitsü aser ‘rotation basis’ nung akatsü aser Academic Excellence atema J.N Aier Trust Award ji 2025 küm Yajang ‘A’ nung ayongba Platinum Jubilee benjungmung tashi agütsütsü lemteta ayu.
JKM-isa JKM Platinum Jubilee benjungmung atema Planning Committee ka tentettsü lemtet aser iba atemaji office ketdangser tasenpur nem nungloktsüogo.
Tanü lima nung Information technology kanga tongtibang ta angateta JKM-i tekaratiba nung official website ka tenzüktsü, iba den külemi JKM züngsemtem tsüngda amaliteptsü aser tangatetba lemsateptsü atema social networking site balala nung group aser pages tenzüktsü lemtet.
Iba dak alia JKM-i corpus fund committee ka tentettsü lemtetogo.
Iba mungdang nung office ketdangsütsü atema ketdangpur tasen shimtetogo. Ketdangpur tasen rongnung Rongsenmongba Aier maneni Tir shimshi aser General Secy., Wapang shimogo.
Iba mungdang nung Mr Japukong- Nungsangtemsu (Yajang ‘A’) aser Miss Japukong – Imcharenla Jamir (Changdang) na shim.
Japukong kaketshir shisaluyim nung tajungpurtem atema JN Aier Trust Award agütsü. Parnok 15 nem certificates aser nisung shia senpet 10,000 agütsü.
Iba mungdang nung tongti o jembirtemji Dr Sunep Imchen (Dy. Chief Veterinary Officer, Mokokchung) aser Dimapur nungi Advocate Supu Jamir liasü.