JLF-i tekaratiba nung Naga yimten latetdaktsünür

Dimapur, January 21 (TYO): January 21, 2019 nü Chairman, JLF-cum-Speaker incharge Zhaleo Rio menden ser Naga Political Issue atema Joint Legislators’ Forum senden ka amen.
Iba mapang November 19, 2018 nü JLF indang Parliamentary Working Committee-i bangzüngtem renemba agizük.
JLF-isa Indo-Naga Political dialogue nung shilem agiba telok ajak aser talisa India sorkar dang yimjung olemtep tajungba nung inyaktsü aser tekaratiba nung telemtetba agitsü atema mepishitsü lemtet.
India sorkari yimjung olemtep nung ajak dendaktsüba aser telok balala den asüngdangya asüba atema pelar. Maneni, Naga National Political Groups (NNPGs)-i India sorkar den olemteptsü mulungba pelashishia agizüker, ta JLF-i metetdaktsü.
Ajak dena telemtetba ka agitettsü atema JLF-i Naga National Political Groups ajaki iba olemtep nung adentsü atema mepishir. Ano, civil society tem, kin teloktem, Arogo, NGOs aser telok ajaki Naga tebilemtsü atema yaritepba atema tenüngsang agütsür, ta parnokisa ashi.
JLF-isa civil society tem aser kin teloktem dang Naga kibong longjemtsü atema mapa inyaktsü mepishia metetdaktsü.
JLF-i NNPGs ajak den jembitsü aser iba sülen Naga yimten tebilemtsü atema Central lennirtem den ajuruteptsü senden nung lemtet.
Iba mapang MLA 60/PWC Members mesüra Leader of the House, Deputy Chief Minister aser Leader of Opposition tem den Political party ajak nungi teshimtet nübotem aser MP temi ajuruteptsü akok, ta parnokisa telemtetba agi.