JNU-i kaketshir 21 nem ‘show-cause notice’ agütsüogo

New Delhi, March 14 (Agencies): Parliament amakba ken o nung aija alenseta südaktsüsang, Afzal Guru bilemteta Jawaharlal Nehru University nung sentong ka ayongzüka agiba tatalokba luden kati bushisüngdangba osang nung ajemdaker Hombarnü JNU-i kaketshir 21 nem show-cause notice agütsüogo.
Tanü Vice Chancellor, M Jagadesh Kumar leniba nung tongti ketdangsertem senden ka amendang züngsem pongui akümba luden-i agütsüba report nung o lemtepba sülen iba telemtetbaji agi.
University ketdangser kati, “Iba report ajanga ashiba agi, kaketshir kari university temzüng aser lateta aliba teinyaktsütem alema inyak. Parnok 21 nem show-cause notice agütsütsü lemtet aser iba atemaji parnok nem March 16 nü tashi mapang agütsüogo,” ta ashi.
Ketdangser jagi kaketshirtem tenüngjibo memetetdaktsü ajisüaka university telung osang ka ajanga ashiba agi, show-cause agüja alir rongnung tamalen anenja alir kaketshir 8 densema lir aser tanüngba 10 ji police-i University dang osang meshiba kaketshirtem lir.
“Temaba jenjang nung bushisüngdangba ludeni benokbatemji JNU temzüngtem aser lateta alibatem nung ajemdaker benokba lir. “Kaketshirtemi agütsüba telangzüba nungji ajemdaker tatembangbuba telemtetbaji agitsü,” ta ketdangserisa ashi.
Feb. 9, 2016 nü JNU nung linük anema yimyim ayim ta tai tongloktsüba bushisüngdangtsü atema luden ka tenteta liasü, aser iba ludeni VC nem report agütsüba sülen JNUSU Tir, Kanhaiya Kumar densema kaketshir ti anenja aliba March 11, 2016 nü agiena liasü.