New Delhi, February 22 (Agencies): Delhi Police-i aputsü bushia aliba Jawaharlal Nehru University (JNU) kaketshir pongu University campus-i meyipa aruba dak sentakba nung o lemtep akatsü atema JNU ketdangsertemi university tongti ketdangsertem senden ka ayongogo.
Deobar aonung nungi tenzük police ketdangsertem University campus kimaji adenshia lir aser parnoki Vice-Chancellor ajurua kaketshirtem dang police matsüngdangi arudakjang ta mepishitsü, ta shiogo.
JNU Registrar, Bhoopender Zutshi-i, kaketshirtem campus telung nung aliba osangji pai osangbenertem dang nungi ang angazük, ta ashi.
“University ketdangsertem senden ka amentsü. Iba senden sülen ang ano telemtetba kar agitsü,” ta Zutshi-i ashi.
Police-i tang tebushitak kaketshir pongu tenüng nung Jawaharlal Nehru University Students’ Union (JNUSU) general secretary, Rama Naga-i, “Onoki police tsübur masü saka loktii onok tepsettsü tsübuba ajanga atsük,” ta shiogo.
Parnokisa, parnok Delhi nung dang liasü aser campus jagi parnok aputsü police arura parnoki pudaktsütsü, ta ashi.
February 9, 2016 nü JNU nung Parliament amaker Afzal Guru aser Jammu Kashmir Liberation Front co-founder, Maqbool Bhat na bilemteta sentong ka ayongzüka agidang India anema yimyim ayim ta tai tongloktsüba sülen kaketshir pongu- Umar Khalid, Anant Prakash Narayan, Ashutosh Kumar, Rama Naga aser Anirban Bhattacharya nunger atsüka liasü, ajisüaka yasüng tesü parnok campus-i meyipa aru.
Yasüng Umar Khalid-i, “Kü tenüng Umar Khalid aser ni kiralongrar ka masü. Anema (university) apusobaji Feb. 9 nü ayongzüka akaba sentong ajanga masü, saka onok anema apusotsü atema sorkari kuli nüngdaka aliba ajanga lir,” ta ashi.
Iba ken o nung Deobar anogo piyong police-i JNU nung atalokba osang agütsür osangbenertem ajurua mesüra parnok kidangi oa asüngdangyaa liasü.
February 9 nü JNU campus nung atalokba bushisüngdangba telok, high-level committee nem anogo anogo 7 nü agütsüsemogo.
Taonung tesü osangbenertem den jembidang Zutshi-i, “Kuli tejangja junga bushisüngdangtsü nüngdakba ajanga tanü committee-i onok dang ano mapang tali meshisem. Onoki anogo 7 agütsüsemogo,” ta ashi.
Supreme Court-i telok balala dang Patiala House court nung tatalokbatem osang meshiba ama Registrar Delhi HC, SC Panel, Delhi Police, Bar Council, Delhi HC Administrative committee aser tai tonglokja alir atema counsel temi court nem osang agütsüogo. Iba ken o maneni March 10 nü angadangtsü.
You must be logged in to post a comment Login