JNU kaketshir asüba atema TN-i CBI nem bushisüngdang südaktsütsü akhanger

New Delhi/Chennai, March 14 (Agencies) : Jawaharlal Nehru University (JNU) nung Dalit MPhil kaketshir arishi küm 27 tain Muthukrishnan soseta asü aser iba atema tang police-i bushisüngdang tesüdak lir.
“Tasüba kuli ano mongutet. Onoki pa indang Facebook page bushisüngdang südar. Pa indang takdang reprangdangogo saka pai züluba shidi kecha mangu. Onoki pa indang takdang shibangtsüogo” ta Ishwar Singh, DCP(South)-i osangbener dang ashi.
Muthukrishnan ya Tamil nadu kübok Salem nungi lir aser pa asüba atema par kibong taoksa aser temulung zürepba tia ka nung lir. Parnoki Muthukrishnan soseta asü ta asüba magizüker.
Tebu Jeevanantham-i par jabaso asüba atema CBI nem bushisüngdang südaktsütsü atema takhangba agütsür.
Tamil Nadu nung yimtenren teloktemia asür Muthukrishnan indang tatalokba bushisüngdang atema takhangba agütsütsü tenzükogo.
Tamil Nadu Chief Minister-i sangdong ka nung, Muthukrishnan asüba atema asüku lemsatepba metetdaktsüogo.
Tamil Nadu sorkari pa mang pa tasoyim tonga bener arutsü atema mapa inyaktsü ta paisa nangzük aser tasür kibong nem sen lakh 3 teyari agütsütsü metetdaktsüogo.
Muthukrishnan asüba atema ozüng amer nem bushisüngdang südaktsütsü, ta AIADMK Deputy General Secretary, TTV Dinakaran-i ashi.
“Iba ken o atema judicial probe asütsüla. Ni Arvind Kejriwal dang ibaji inyaktsü ayongzüker” ta paisa ashi.
JNU campus nung kaketshirtem bendanga amshir ta Muthukrishnan-i pa indang blog post nung ashiba angudang kanga aoksar, ta Dinakaran-isa shisem.
“Ni kanga jashir. Par kibong den asüku lemsar. Iba tatalokba ya jungjunga bushisüngdangtsüla. Ibaji asü nungdang kaketshir nem temeten agütsütsü” ta O. Panneerselvam-i ashi.
Tamil Nadu nung Opposition-ia JNU kaketshir asüba atema CBI nem bushisüngdang südakjang ta takhangba agütsü.
“Yaküm Tirupur nungi AIIMS kaketshir ka asü. Iba mapang ni CBI nem bushisüngdang südakjang ta takhangba agütsü saka Delhi police-i iba tatalokbaji soseta asüba liasü ta shia bushisüngdang asütsü memulung. Tang ano Tamil Nadu nungi kaketshir ka süogo aser police-isa soseta asü ta ashir. TN Chief Minister-i iba asoshi Prime Minister den jembitsüla aser bushisüngdang südaktsütsüla” ta TN nung Opposition lennir metetdaktsü.
Hyderabad nungi kaketshir Rohith Vemula asüba sülen ita ter pezü ajungba anogo nung Muthukrishnan asü. Tenaprong ya Dalit nunger temeten atema inyakertem liasü saka tenaprong asü.