JNU kaketshirtem lungkak aittsü ni majungshi: Hafiz Saeed

New Delhi, February 17 (Agencies): Parliament amakba ken o nung aija Afzal Guru tepsetba bilemteta tawa JNU kaketshir telok kati linük anema yimyim ayimba ken o nung Union Home Minister, Rajnath Singh-i JNU nung linük anemba maparenji JuD tongti, Hafiz Mohammad Saeed-i pusema inyak, ta aija lir ajisüaka tanü Saeed-i ibaji tai ta shiogo.

YouTube nung video osang ka ajanga Saeed-i, “Jawaharlal Nehru University nung Pakistan pusema Kashmir kaketshirtemi yimyim ayimba nungji ni shilem agia lir ta India home minister-i aitsüogo. Iba dak sentakba nungsa pai (Rajnath) kü twitter osang indanga jembiogo. Kü tenüng nung twitter osang ka indang Indian home minister-i jembiba ajanga ni süngmanger,” ta ashi.

“Kaketshirtem lungkak aitba nungji kü shilem mali aser parnok lungkak aittsüsa ni twitter ajanga majungshi. Iba twitter osangji taila. Lungkak aitbaji ni ajanga ta India-i ken o ka kümdaktsüogo,” ta pai ashi.

Lashkar-e-Taiba tentetsang Saeed-isa, Kashmir-i nüjiso bushiba atema inyakba maparenji India-i koma repranger’ar ni shisadanger, ta ashi.

Paisa Rajnath aser tangar ketdangsertem dang Kashmir nüburtemi mepishiba ola angadaktsüner, ta ashi.

“Kashmir nungeri nüjiso atema rarabaji asayamenu ka ama magitsüla,” ta pai ashi.

“Ni Kashmir kaketshirtem majungshi, ta ni ano nenshia ashir. Afzal Guru ji koma alenseta südaktsü’ar nenoki memetet ama (?) Kashmir nüburtem pei lima nung koma taochi makai tepseter’ar nenoki memetet ama (?)” ta pai asüngdang.

Jamaat-ud-Dawah tongti Saeed-isa, India-i maneni Kashmir onük sentoker, ta aitsü.

“Kashmir Movement ya lisopurtemi tenzük. Kashmir nüburtemibo ola madoktsü asü (?),” ta pai asüngdang.