JNU kaketshirtem nem agutsüba temerenshi agientsü makok: Smriti Irani

New Delhi, May 07 (Agencies): Human Resource Development minister, Smriti Irani-i, University tem nung kaketshirtem nem agütsüba temerenshi magientettsü, item rejutem nem ketdangsütsü tashi peria agüja lir, ta ashi.
Rajya Sabha nung o lemtepdang Congress nungi Ananda Bhaskar Rapolu-i, university balala nung kaketshirtemi temerenshi agientsü atema Irani dak imlar ta jembiba sülen Irani-i, University ketdangsüba nung amoktsü atema iba Parliament-i memelar, University nemji tashi peria agüjang, ta ashi.
Hokolbarnü Rajya Sabha züngsemtemi JNU kaketshirtem temerenshi agüja aliba agientsü mepishia liasü.
Zero Hour mapang nung CPI züngsem, D Raja-i iba onük süoka jembi aser ibaji Sharad Yadav (JD-U) densema Rajya Sabha züngsem aikati pusema liasü.
Deputy Chairperson, P J Kurien-ia sorkari iba onük bentettsüla ta ashiba den külemi Minister of State for Parliamentary Affairs, Mukhtar Abbas Naqvi dang House züngsemtem tebilembaji minister (Irani) nem metetdaktsütsüla, ta shia liasü.
Sorkar teyari bushia Raja-i,  JNU kaketshirtem anogo 8 nü tashi lumia lungkak aiter aser tesayurtema lungkak aitba nung denogo, iba ya süoki ia agitsü onük ka lir, ta jembia liasü.