JNU kaketshirtemji linük meimertem: Kanhaiya Kumar

New Delhi, March 04, 2016 : JNUSU Tir, Kanhaiya Kumar Brihostibar aonung Tihal jail nungi aluba sülen tanü JNU campus nung pai osangbenertem den jembiba noksa nung angur.

 New Delhi, March 04 (Agencies): Brihostibar aonung Tihar Jail nungi bail nung alua Jawaharlal Nehru University (JNU) nung JNUSU Tir, Kanhaiya Kumar-i jembiba sülen anogo ka lir Hokolbarnü pai pa pusemer ajak dang pelaba lemsatepogo.

Tanü osangbenertem den jembidang Kanhaiya-i, “Lenla ajaklen nungi nisungtemi onok pusemogo. Ni nisung ajak dang aser iba linük nung saru agütsür ajak dang ya shiner- JNU kaketshirtem ya linük meimertem lir. Iba ya onok University tenüng menüktsütsü atema inyakba lir. JNU-i kodanga linük Temzüng alema inyakba pusema maru aser kodanga masütsü. Video bo yanglushitsü akok, saka Linük Temzüngbo meyanglutettsü,” ta pai ashi.

“Aluyimertem, sepaitem aser Rohith Vemula nungeri taküm tenlabaji amajok masütsü. Kodangsa asüngsashi ka tenzükdir, sorkari ibaji nokdangtsü meranger. Sedition ozüng ya British sorkari asenok nokdangtsü atema yanglu,” ta paisa ashi.

Ato kilonser Narendra Modi dang Kumar-i, “Onok nü dang nija tejashiba kecha mali. Asenok tangatetba nung tetsüngda iita lir,” ta ashi.

Parliament amakba ken o nung aitsüba sülen alenseta südaktsüsang Afzal Guru dak sentakba nung Kanhaiya-i, “JNUSU Tir ka ama ni pa ya India senso ka lir ta ashir, shiba India Temzüng ajanga aitsü. Ni atema tatishitsü sayurji Afzal Guru masü saka Rohith Vemula lir,” ta ashi.

Kanhaiya ya linük anema inyakba ken o nung tai tonglokja apu. Yasüng JNU campus atongba sülen jembidang pai, “Kaketshirtemi India dang nungi nüji aginer masü saka India nung nüji aginer,” ta ashi.

Sorkar aitsüba olen ka nung pai, “Magic sayuba yim ka nungi ni aru, nisungtemi magic sayur aser kuri (ring) yoka parnok tebilemba ataloker. Parnok ama nisungtemji asen linük nunga lir, aser parnoki black money bener arutsü ta jembiba den külemio ajak atema terenlok ta jembir,” ta ashi.

“Sorkari taitsüba magizükteter,” ta paisa ashi.

Tanü pai, Kerala aser West Bengal Assembly election atema pai Left Front asoshi nübo yimtsütsü, ta sangdongogo. Ajisüaka pai pa yimteren nübo ka masü ta shia, “Ni yimtenren nübo ka masü. JNU-i shimba atema ni pelar,” ta ashi.

West Bengal nung April 4, 11, 17, 21, 25, 30 aser May 5 anogotem nung assembly election agitsü aser Kerala nung May 16 nü agitsü.