JNU ken o: Kanhaiya dang senchi 10,000, Umar semester ka meintok

New Delhi, April 25 (Agencies): Taküm January 9 nü Jawaharlal Nehru University (JNU) nung sentong ka ayongzükba atema JNU ketdangsertemi JNU kaketshir Tir, Kanhaiya Kumar dang senchi Rs 10,000 aser külem kaketshir, Umar Khalid semester ka campus nungi meintokogo.

Iba sentong nung linük anema yimyim ayimba ken o nung tenaprong apuba sülen Tihar Jail-i yok; ajisüaka taoba ita tenaprong bail nung chiokogo.

High level enquiry committee (HLEC) report nung ajemdaker University ketdangsertemi Mujeeb Gattoo aser Anirban Bhattacharya na densema iba sentong nung shilem agir kaketshir 14 nema temerenshi agütsüogo.

JNU senior ketdangser kati ashiba agi, PhD kaketshirtem- Bhattacharya, Khalid aser Gattoo nunger ajak mapang tatsüka atema University nungi meintok. Bhattacharya July 15, 2016 tashi meintok aser July 23, 2016 nungi JNU campus nung küm 5 tashi saisapong masütsü. Khalid-a semester ka University nungi meintokba den külemi senchi Rs 20,000 chiogo. Ano Gattoo-a semester ana University nungi meintok.

Kumar aser JNUSU joint secretary, Saurabh Sharma naprong dang senchi Rs 10,000 achi. Ajisüaka temerenshi tuluba agütsübaji taoba mapang JNUSU Tir, Ashutosh Kumar dang senchi Rs 20,000 den University nung pa dang nungi hostel facility ajak agienogo. Ano kaketshir Komal Mohite July 21, 2016 tashi University nungi meintokba den külemi senchi Rs 20,000 chiogo.

Senchi Rs 20,000 achir tanüngba kaketshirtemji Rama Naga, Ananth Kumar, Sweta Raj, Rubina aser Chintu Kumari nunger lir. Ano Banojyotsna Lahiri aser Draupadi Gosh na küm 5 tashi campus nung saisapongtsü memelar.

Kanhaiya ya February 12 nü apu aser anogo 10 lir Umar aser Anirban nati police matsüngdagi ao. Police-i par asem dang asüngdagyaba sülen JNU sentong nung shilem agir nisung 22 tashi jangjaa liasü.