JNU ken o nung opposition party temi sorkar aitsü

New Delhi, February 25 (Agencies): Hyderabad University nung Dalit nunger kaketshir Rohit Vemula soseta asüba aser JNU ken o nung tanü Rajya Sabha nung treasury aser opposition bench tsüngda o toktepogo.
Tanep senden nung o toktep tenzüka CPM General Secretary, Sitaram Yechury-i, Modi’er sorkari Jawaharlal Nehru University (JNU) ken o nung shilem agir ta aitsü.
“Linük meimba nüngtem nung University rangben temerenshi agütsütsübaji tia maka ta ni bilemer. Linük meimba indang nenoki onok dang sayutsü menüngdaker,” ta pai ashi.
BJP-i melung mesüi ola adokertem ola nembangtsütsü meranger aser parnok tangatetba, Hindu Rashtra benoktsü meranger ta Sitaram-i aitsü.
Sorkari University kar nung jangjongbaji ozüng alema lir, ta paisa ashi.
Sorkar tashi nung alirtemi linük meimba tangatetba benokbaji Chuba Ashoka mapang nungi Rabindranath Tagore aser Mahatma Gandhi nunger tashi tangatetba anema lir ta shia, Yechury-i, “Iba ya süoki ia agitsü onük ka lir” ta ashiba den külemi, opposition-i sorkar anema noktakra ibaji-a linük anemba asü(?) ta asüngdang.
JNU kaketshir telongjem Tir, Kanhaiya Kumar-i jembiba o nung ajemdaker Sitaram-i, “Ni-a sadoka aliba aginer. Ayatsüra nungi jenbua liner, akhi mapang tamangba yimsü temzüngtem nungi talenba salaner aser sensak tia nungi talenba salaner. Iba atemaji nenoki ni aputsü akok, ajisüaka asen chirnurtem anema sentong tamajung yangluba anentsüla,” ta pai ashi.
Paisa, “Mahatma Gandhi tepsetertem dang nungi linük meimba certificates onoki menüngdaker,” ta ashi.
Finance Minister, Arun Jaitley-i, February 9 nü JNU nung sentong ayongzükertemi Parliament amakba ken o nung aitsür, Afzal Guru alenseta südaktsübaji judicial ajanga tepsetba ta sangdong, ta ashi.
Jaitley-i, opposition temi ‘India loksatsü indang jembirtem’ akhümtsübur ta aitsü. Paisa, “Linük nung tangatetba ka dang alitsüla ta NDA mesüra BJP napronglai mashir,” ta ashi.
“Tesempa o jembibaji o sademsadema jembiba masü,” ta pai ashi.
Rajya Sabha nung Opposition lenir, Ghulam Nabi Azad-i, “Secularism aser nationalism onük nung nenok (BJP) aina agi yangluba ki ka nung alir. Onok lungro agi yangluba kidang kümzüka alir. Onoki lung kati danga aon nung aina agi yangluba kiji raksatsü,” ta ashi.
Yashi Lok Sabha senden nung Singh-i, “Tai maket kaketshirtem memerenshitsü. Sorkar atsüngdoktsü merangba ken o benokbaji shitak süra court-i ken o akatsü, tai süra court-i thitsütsü,” ta jembi.
Patiala House court tatalokba nung BJP MLA, O P Sharma aser lawyer ana nem Delhi police-i bail agütsüba dak sentakba nung opposition lenir Azad-isa, JNU ken o nung kodaser “doctored video” ka nung ajemdaker sorkar anema apusoba ken o benoker (?) Kechiba Patiala court nung chichiba video noksa apir minute 30 tsüngda FIR benoka bail agütsü (?)” ta asüngdang.
Rajnath Singh-i, “Patiala court nung atalokbaji tejashitsüka lir aser maneni ni aitsür. Shisakar shingaia ibai pu masemtsü. Parnok anema inyakogo ta ni ashir. FIR benokogo,” ta ashi.
Singh-isa, iba tatalokba anogo nung pai Delhi Police Commissioner, B S Bassi den jembia iba tatalokba anema inyaktsü tuyuogo ta ashi.
Patiala court nung osangbenertem, kaketshirtem aser tesayurtem dak azüker advocate temji tema nung nemzüa senzüdar ta aitsüba dak sentakba nung Home Minister-i, “Parnok tema nung mesüra Jail telung nung alitsüji court-i dang lemtettsü. Police-i bushisüngdangba nung onoki kodanga tiyongtsü mair aser tarutsü nungi ni tiyongtsü kodanga maitsü,” ta ashi.
Paisa FIR benokba section tem zünga ashidang Azad noktaker,” Onoki melung masür. Parnok kümzükogo. Onok kimai alur,” ta ashi.
Iba sülen taoba Ato kilonser, Manmohan Singh densema Congress züngsemtem aser Left züngsemtem kima alu.