JNU lenir Kanhaiya-i bail meshi; SC-i tanü angadangtsü

New Delhi, February 18, 2016: Linük anema inyakba ken o nung Jawaharlal Nehru University Student Union (JNUSU) Tir, Kanhaiya Kumar apuba anema Brihostibarnü New Delhi nung kaketshirtem, tesayurtem aser temelungertem merirjang aika adenshia lungkak aitba noksa nung angur. JNU lenir Kumar ya March 2, 2016 tashi Judical ket nung agüja lir.

New Delhi, Feb. 18 (Agencies): Brihostibarnü Jawaharlal Nehru University Students Union (JNUSU) Tir, Kanhaiya Kumar-i, Tihar Jail nung pa taküm amokmeren tulu nung lir ta shia Supreme Court (SC) dang bail meshiogo.
Linük anema inyakba ken o nung tai tonglokja pua alisang Kanhaiya ya yashi Patiala House court-i anir aoba mapang obendangertemi pa dak teka sangshia liasü.
Advocate, Anindita Pujari ajanga temepishiba benokba nungji JNU lenir Kumar-i, pai aibelena mali, ta shiogo.
Paisa, pa taküm amokmeren tia nung lir aser pa taküm kümzüka alitsü atema Supreme Court-i inyaktsü nüngdak, ta ashi.
Kumar-i, pa tepouktak ayuba ajanga kecha masütsü, kechiyong pa okadaki anir aoba mapang nunga police-i kanga timtem ajuru, ta ashi.
Pai benokba temepishibaji senior advocate, Soli J Sorabjee aser Raju Ramachandran nati SC bench ka nung Justice- J Chelameswar aser AM Sapre na matsüngdang benokogo.
Soli aser Raju natibo iba temepishibaji Brihostibarnüsa angadaktsünüa liasü, ajisüaka SC bench-i iba temepishibaji Hokolbarnü ang angadangtsü, ta shiogo.