JNU nung azünger Umar Khalid dak injang khaloktsü

New Delhi, Luroi/August 13 (Agencies): Independence Day atongtsü anogo ananü dang lia tanü Parliament anasa Constitution Club nung sentong ka agidang Jawaharlal Nehru University (JNU) nung azünger, Umar Khalid dak mejangjaba nisung kari injang khaloktsü.
Tang Umar Khalid nem security junga agüja lir, ajisüaka mejangjaba nsingtemi pa dak injang khaloktsü, saka pa meyiru, ta police-i metedaktsü.
“United Against Hate” tenteti ayongzükba ‘Khauff Se Azaadi’ sentong nung adentsü atema pa iba tesem jagi oa liasü.
Iba tatalokba sülen osangbenertem den jembidang pai, “Linük nung tetsübu tensa ka lir, aser sorkar anema jembir ajak amokmerener,” ta ashi.
Tenük kuli alirtemi ashiba agi, nisung asem arua Umar Khalid dak injang anaben khaloktsü.
Khalid den külemi alir kati, “Sentong agitsü aliba tesem anasa süngo ayokba stall ka nung onok alidang tola temesüng semer alir kati pa dak injang khaloktsü. Khalid ali nung lao saka kecha meyiru. Iba sülen nisungba jagi pistol ji yutsür ajen,” ta ashi.
Iba dak sendakba nung JNU nung azünger aser activist, Shehla Rashid-i, “Aoksar aser sashia aitsür. Ni Umar den jembiogo. Pa junga lir, ajisüaka pa taküm kümzüka alitsü atema asenoki kanga shisa bulutsüla,” ta ashi.
Deputy Commissioner of Police, Madhur Verma-i, “Nisung kari Umar Khalid dak pongloka nungloktsü, iba sülen pai Khalid dak injang khaloktsütsü merang, ajisüaka pa idangyongjisa injang mekhaloktsütet. Nisungtemi pa arishia ao, iba sülen Khalid-i ashiba agi, nisungba jagi anünglen injang khadok,” ta ashi.
Taküm Aami/June ita nung Umar Khalid-i, nisung kari pa taküm agitsü amokmerner, ta ken o ka agüja liasü.