JNU onük nung BJP aser Left Parties na o langzütep

New Delhi, November 22 (Agencies): Hokolbarnü Rajya Sabha senden nung Jawaharlal Nehru University (JNU) kaketshirtemi hostel fees atuba aser draft hostel manual nung alibatem anema longkak aitba onük nung BJP aser Left party tem tsüngda o langzütepa rongrong adoka liasü.
Zero Hour mapang nung CPI(M) nungi K K Ragesh-i, JNU onük süoka police-i longkak aiter kaketshirtem dak azükbaji judicial nem bushisüngdangdaktsütsüla, ta takhangba agütsü.
Iba sülen BJP nungi Prabhat Jha-i JNU Campus nung Swami Vivekananda kürakyanglu (ano mesemzük) raksatsüba indang metetdaktsü.
Paisa JNU nung kaketshirtemi India anema yimyim ayimba indang metetdaktsüba den külemi Central sorkar nem JNU nung inyakba mapatem ketdangsüa reprangdaktsütsüla, ta takhangba agütsü. Iba takhangbaji Left party züngsemtemi ashishia liasü.
Rajya Sabha Chairman, M Venkaiah Naidu-i Ragesh o tejembidak nung tsüdanga aita “JNU fee atuba aser Vivekananda kürakyanglu raksatsüba onük dang jembitsü atema melatsü,” ta metetdaktsü.
Ragesh-isa, JNU kaketshirtemi joko ita ka shi JNU fees jenjang alutsü akhangba den University campus nung democratic temeden balala agüjang, ta longkak aita arudar, ta ashi.
Tawa item takhangba agüja JNU kaketshirtemi Parliament tashi longkak aita aodang police-i parnok dak ajok agi züka liasü; iba sülen kaketshir lenirtemji police station-i anir oa mejungi azük, ta paisa ashi.
Police-i inyakba mapatemji judicial nem bushisüngdangdaktsütsüla, ta ashiba mapang Naidu-i, nai fees atuba indang mejembir, ta ashi.
Ragesh nem lemzüktsüba mapang ano minute 3 anünga liaka pa indang microphone switch off sütsü, iba sülen Jha-i, Vivekananda indang kürakyangluji temerem agi nübangtsü aser ‘oadokang saffron (BJP)’ ta zülutsür liasü, ta ashi.
Left party züngsemtemi pai jembiba oji aitsüba mapang nung paisa, tesüiba küm pongu tashi JNU nung India anemba yimyimtem ayima arur, ta ashi.