JNU sentong atema temerenshi agütsütsü luden-i benoker

New Delhi, March 12 (Agencies): February 9, 2016 nü Jawaharlal Nehru University nung linük anema yimyim ayim ta tai tongloktsüba osang bushisüngdangba ludeni Vice Chancellor (VC) nem report agütsüba sülen tanü JNU-i kaketshir ti anenja aliba agientsü.
VC, Jagadesh Kumar-i report ji reprangshiba sülen tatembangbuba telemtetba agitsü.
Ajisüaka ludeni agütsüba report nungji kaketshir kar anema temerenshi agütsütsü aser senchi achitsü benoka lir, ta JNU osang ka ajanga ashi.
Anenja aliba JNU kaketshirtem rongnung JNU kaketshir telongjem Tir, Kanhaiya den Umar Khalid, Anirban Bhattacharya, Ashutosh, Rama Naga, Anant Kumar, Shweta Raj aser Aishwarya Adhikari nunger dena lir.
Afzal Guru alenseta südaktsüba anema Feb. 9 nü taküm agi asembenbuba sentong ayongzükba atema Feb. 12 nü parnok 8 anentsü.
Ajisüaka Kanhaiya-ibo, parnoki bushisüngdangba ludeni agütsüba report ji magizüktsü, kechiyong parnoki maneni iba luden nung SC/ST nungia adentsü akhanger, ta ashi.
Kanhaiya-i, “Tanü (Hokolbar) onoki vice chancellor ajuruogo, aser pai onok dang, onok 8 anentsübaji taonung ayaterm nungi agientsü ta shiogo. Pai bushisüngdangba luden nungi anguba osang aser temerenshi agütsütsü benokba indang shiogo, aser ibaji taruba hopta sangdongtsü. Onoki pa dang, JNUSU-i ludeni agütsüba osangji magizüktsü, kechiyong anogo ana tejaklen onoki bushisüngdangba ludenji democracy inyakyim nung asütsüla ta takhangba agütsüogo ta ashi,” ta metetdaktsü.
“Registrar-i agiba shilem nung terataba lir, aser kodaser osangji iba office nungi prok. VC-i iba atemaji inyaktsüla. Aji oda mesüra bushisüngdangba luden nungji ochi mali. Temerenshi magütsüdang onoki VC nem külen tsütsü (kaketshirtem) nungia o angadangdaktsüner,” ta paisa ashi.
Iba luden nung mezüngbo züngsem asem dang liasü, ajisüaka tesayurtem aser kaketshirtemi akhangba ajanga ano züngsem ana inoksem.