JNU sülen Jadavpur nunga India anema yimyim ayim

Kolkata, February 17 (Agencies): Jawaharlal Nehru University (JNU), Delhi nung kaketshir telok kati India anema yimyim ayimba ajanga mangatettep ken o tulu adoka aliba mapang ka nung tang Jadavpur University, Kolkata nunga India anema yimyim ayimogo.

Linük anema inyakba ken o nung JNU Student’s Union Tir, Kanhaiya Kumar apuba sülen Mongolbar aonunga Jadavpur University nung Afzal Guru pusemba yimyim ayimogo.

Zee Media osang ka ajanga ashiba agi, Jadavpur University nungi tebur aser tetsür lanur telok kati “Afzal bole azadi, Geelani bole azadi” aser “Chhinke lenge azadi” ta yimyim ayim, aser iba sentongji video camera ajanga tangoka liasü.

Lanurtem jagisa “RSS nungi talenba salatsüla, Modi’er sorkar nungi talenba salatsüla”, “Jab Kashmir ne maangi azadi, Manipur bhi boli azadi” ta yimyim ayim.

Kaketshirtem jagi JNU lenir Kanhaiya apuba anema jembiba den külemi Hyderabad University nung azünger Dalit kaketshir Rohith Vemula soseta asüba atema-a aitsüogo.

All India Students Association (AISA) lenir, Anumita Mitra-i item yimyimji ayima, Parliament amakba nung aitsür, Afzal ken o ochishia magii tasüba temerenshi agütsü, aser iba nungji tasüngdangba akar, ta ashi.

Ano iba sentong nung shilem agir SFI local committee secretary, Samanya Raha-ia, iba sentong ya Kanhaiya Kumar apuba anema ola adoktsü ayongba lir, ta ashi.

Zee Media den jembidang BJP National Secretary, Sidharth Nath Singh-i, “Jadavpur University nung atalokbaji kanga tia maka. Item ama yimyim ajanga nisung kari India nung telemsa adokdaktsünüba kuli sayur,” ta ashi.

Bengal Chief Minister Mamata Banejree aija Singh-i, “Jadavpur University telung nung linük anema yimyim ayimba atema Mamata’er sorkari ola madoker. Nisung shingaia iba tatalokba maitsür. Iba atema TMC-i temerenshi magütsütsü ta ni bilemer. Video nung linük anema yimyim ayimertemji TMC-i aputsüla. Iba ya sademsadema jembiba temeten ka masü saka linük anemba tangatetba,” ta ashi.

Item tatalokba anema ABVP teloki JNU, JU, U0H, FTII Pune aser IIT Madras rejutem nung lungkak aittsüa akok.

JU nung linük anema yimyim ayimba anema February 18 nü WB nung BJP, Yuva Morcha-i lungkak aittsü.