JNU ya linük anemba tiyongtsü tesem ka mekümdaktsütsü: Kiren Rijiju

New Delhi, February 13 (Agencies): Tawa Jawaharlal Nehru University (JNU) campus nung sentong ka alidang kaketshir telok kati India anema inyakba ken o nung Honibarnü Union Minister, Kiren Rijiju-i, tongtibang shisaliok rejuji linük anema inyakba tesem ka mekümdaktsütsü, ta ashi.
Linük anema inyakba ken o nung JNU students union Tir, Kanhaiya Kumar apuba sülen anogo ka lir osangbenertem den jembidang Rijiju-i, “JNU ji linük anemba maparen inyakba tiyongtsü ka akümtsü onoki memelatsü,” ta ashi.
Minister of State for Home Kiren-i, sademsadema jembitsü temeten nungji telatetba aser tenokdangba-a alitsüla, ta ashi.
“Iba ya tia maka tatalokba ka lir. Ajisüaka parnokji (kaketshirtem) parnoki inyakba memetettsüsa tila tanurtem masü. Sademsadema jembitsü temeten aliba nüngtem nung nenoki linük anema jembitsü makok,” ta paisa ashi.
Rijiju-isa, Delhi Police-i inyakbaji osang anguba nung ajemdaker inyak, aser linük onük den telongjem onükji shingaia yimtenren onük ka mekümdaktsütsüla, ta ashi.
JNU kaketshirtemji yimtenren party kari ajungmesoba lir, ta pai tai tongloktsüogo.
Mongolbarnü JNU Campus nung sentong ka alidang, 2013 küm Parliament amakba ken o nung aija Afzal Huru alenseta südaktsüba anema kaketshir telok kati sorkar aser linük anema yimyim ayimba ken o nung JNU students union Tir apu.
Kanhaiya ya CPI indang student wing All India Student Federation (AISF) züngsem ka lir.
Tanü Left aser JD(U) lenir teshimtet telok kati Home Minister, Rajnath Singh ajurua Kanhaiya chioktsü mepishiogo.