JNUSU Tir Kanhaiya temang majungba ajanga lumiba anener

New Delhi, May 07 (Agencies): Jawaharlal Nehru University Students Union (JNUSU) Tir, Kanhaiya Kumar-i anogo 9nübuba lumia lungkak aitdang temang tamajungba akümba ajanga Hokolbar nü ilonga mozükidangi anir oa liasü.
Pa temang nung tzü kanga ajema akümba aser ‘ketosis’ timtem ajanga mozükidangi anir aoba sülen kasa anogo nung mozüki toktsü, aser pai lumia lungkak aitba anener ta sangdonga liasü.
“Kanhaiya AIIMS toktsüogo. Pa dang anogo ishika yipten nung anisüngzüktsü tuyuogo. Pa medical test kar agitsüsa aküm, anungji pa temang majungba nung ajemdaker pai lumiba anener, ajisüaka maneni lungkak aittsü,” ta JNSU sangdong ka ajanga ashi.
Taküm January ita nung JNU campus nung sentong ka alidang linük anema inyakba ken o nung tai tonglokja Kanhaiya tepoukdaki yokba sülen bail nung chioka liasü. Kasa ken o nung JNU committee kati pa den kaketshir 25 dang senchi achiba anema pai April 28 nungi tenzüka lumia lungkak aita liasü.
Bodhbar nü ABVP züngsem pongu, JNU ketdangsertemi parnok takhangba ataloktsütsü ta shiogo ta shia lungkak aitba anen, aser yashi Left den adenba teloktem nungi züngsem pongu temang tamajungba akumba ajanga lungkak aitba anena liasü.
University kedangsertemi kaketshirtem dang campus nung tensa meraksatsü atema tangar mejaoktsü tuyua lir.