Jo Foundation Inclusive School-i Parents Day among

Kohima, Mongputeni/October 04 (TYO): October 04, 2019 nü Kohima nung Jo Foundation Inclusive School-i school campus nung Parents Day ayongzüka mongogo, ta ketdangsertem osang ka ajanga metetdaktsü.
Iba sentong nung o jembitsü atema jaoker Principal Secretary, School Education & SCERT, Menukhol John-i Jo Foundation nung azüngertemi shilem balala junga agiba atema pelaba metetdaktsüba den külemi school-i pa nem teka agi züluba invitation card agütsüba atema pelaba shisem.
Principal Secretary-isa school Proprietor, Daniel Thong aser Dr. Asunu Thong na nem tenüngsang agüja, iba school tetenzükdangbo tenapronglai tayongzükba aser timtem aika ajangshia aruogo, ajisüaka tanübo tsüraburtem aser kaketshirtem nem temoatsü agütsür kaka kümogo, ta ashi.
Paisa school nung tesayurtem dang kaketshirtem ajak tajungtiba nung anepalua anitetba atema pelaba lemsatepba den külemi kaketshirtem dang tesayurtem aser tsüraburtem tashi angatsü ayongzük.
Lokti agizükba o jembidang Chairman, Jo Foundation, Daniel Thong-i, Jo Foundation ya inclusive school ka lir, kong kaketshirtemi arua normal tanurtem den kecha tebendang makai amalitepa alitsü tesayuba agütsür, ta ashi.
Kasa sentong nungsa film ken balala nungi kaketshirtemi shilem agi aser Mansurai Kungfu sayua liasü.