John Abraham-i Force 3 film memunui tangoktsü shiogo

Mumbai, November 26, 2016 : Actor John Abraham-i Force 3 film memunui tenzüka tangoktsü ta osang tejangja metetdaktsüogo.
John aser Sonakshi Sinha nati tongti shilem agiba film, ‘Force 2’ agi box office aser film takok anguba benjong nung kanga takok ngudar, ta film nung tongti shilem agisang aser film producer John-i ashi.
“Onoki ano Force 3 film yanglutsübasa aser Abhinay Deo-i direct asütsü. Iba film ji Vipul (Shah) künati produce asütsü. Iba film ya 2017 küm tom ka nungibo tenzüka tangoktsü,” ta John-i osangbenertem dang ashi.
Iba film nung shilem agir Tahir Raj Bhasin-i film takok anguba atema benjong ka amung. Iba benjong nung adentsü asoshi arishi küm 43 tain, Bollywood actor aso ajen tajungtiba rongnung ka, John-a bike ka nung aru aser pai, “Ni kodang peladir bike anir senzüner. Film ajanga takok anguba agi ni bike anir jajar,” ta ashi.
“Onoki film agi takok bentsür aruba atema benjong amunger. Onoki iba film atema kanga meranga inyakba ama takok tulu anguba asoshi ni kanga pelar,” ta pai ashi.
John Abraham-i ashiba agi, pai tan tesüsa shilem agiba film, Force 2 ajanga kanga takok ngua sen aadar, ajisüaka tang linük nung sen nokdangba inyakyim agi imlaba amabo masü. Film jungerbo box office nung takok angutsübasa. Madras Café sülenbo tan sayaba film nüburtemi kanga sapur.
Iba film ya John indang JA Entertainment-i produce asü aser December 23, 2016 nü Aamir Khan-i shilem agiba ‘Dangal’ film masaya tashi tajangzük junga angutsü ama John-i imlar.