John Kerry-i ajungbena Afghanistan semdanger

Kabul kübok Char Chinar Palace kilung nung senden ka amenba jakdang U.S. Secretary of State, John Kerry (Abelen) aser Afghanistan Foreign Minister, Salahuddin Rabbani nati sensak asemba noksa nung angur. (Kabul, April 09)

Kabul, April 09 (Agencies): US Secretary of State, John Kerry-i mapang jilia osang memetetdaktsüi Afghanistan tanü, Honibar nü semdangogo.
Par US sorkari Afghanistan nung tentetba teloktep sorkar nungita yaritsü renema alibaren sayutsü nükjidong nung Kerry-i tan ajungbena Afghanistan semdanger lir.
Iraq yimtiba, Baghdad yashi, Hokolbar nü semdangba sülen Kerry-i tanü Kabul yimtiba semdanger lir aser pai tan Afghanistan semdangba ya 2014 küm April ita semdangba sülenbo tan mezüngsüa Afghanistan semdanger lir.
Kabul nung tentetba teloktep sorkari par yimsüsütsüren kümsük 5 tenzüka tang agi ita 18 buba tashi Afghanistan madak yimsü asütsü tenzüka lir.
Tir election nung mangatettep tulu adokba sülen US sorkari ayonga Afghanistan Tir, Ashraf Ghani aser Chief Executive, Abdullah Abdullah nati aroki lungjemer par Afghanistan madak yimsü asütsü tezüngzüktep agidakja liasü.
Ajisüaka, nübur noklang nung shilem 80 shi Ghani-Abdullah nati yimsü asübaren dak temulung machiba osang ka US Broadcasting Board of Governors (US BBG) aser Gallup tentet nati bushiteta lir.
Afghanistan nung Islamic sharia ozüng benoktsü meranger Taliban telok aser Afghanistan sorkar na tsüngda yimjung nung alitsü tezüngzüktep agitsü mapatong takok ngua meinyaki anendaka aliba ajanga nübur timbakati par lenirtem dak temulung machiba osanga bushitetogo.
US, Afghanistan, Pakistan aser China nunger densemba Quadrilateral Coordination Group (QCG) tentetia Afghanistan sorkar aser Taliban telok na tsüngda yimjung senden maneni amentsü asoshi taoba March ita ayong saka par tenteti tamakok ajurua liasü.
Aji oda, tan Afghanistan semdangdang, Afghanistan aser Taliban telok na tsüngda yimjung senden tanaben amentsü lenmang sadema lapoktsütsü alizüng Kerry-i ayuba osang angazükogo.
Kerry-i tan hopta tepiyong agia Middle East aser Asia na semdangtsü mapatong den sentaktepa, tan Afghanistan semdanger lir.
Pai maneni Japan semdanga Hiroshima yimti nung amentsü ayongba Group of 7 (G-7) ministerial senden nung shilem agitsü sentong renema lir.