John Lennon-i atemba Guitar sen million 2.4 yong yokogo

London, November 09 (Agencies): Beatles kentener, John Lennon-i tesüiba mapang atemba acoustic guitar ka dollar sen million 2.4 agi ayokba osang ka metetdaktsüogo.

Lennon-i amshiba J-160E Gibson guitar-ji America kübok Los Angeles yimti nung tentetba Julien’s Auctions-i ayokba osang jangjago.

Ajisüaka, Beatles telok den sentaktepba tongti guitar-ji shibai alizük iba osangbo alima dang memetetdaktsüir lir.

“Taoba Honibar yokdokba guitar-ji Beatles teloki tesüiba mapang, December 1963 küm ayongba Finsbury Park Christmas sentong nung tema benshiba sülen samar küm 50 shi süir tanaben anguba guitar lir,” ta Julien’s-i osang jangjashitsü.

Beatles telok nung züngsm ana, Lennon aser George Harrison nati Gibson guitar 2 tashi Britain kübok Liverpool yimti nung tentetba Rushworth’s Music House nungi 1962 küm alizükba osang bushiteta lir.

America nung yangludaktsür külen Britain tonga bener aoba guitar anaji amshia, Beatles teloki 1962 nungi 1963 tsüngda ken aika record asüba osanga bushiteta lir.

Julien’s-isa ashiba agi, Lennon-i tan ayokba guitar-ji tema külem telokpur, Paul McCartney den ‘She Loves You’, ‘I Want to Hodl Your Hand’ aser ‘Please Please, Me’ nunger ken mejema züluba osang jangjaogo.

Tan ayokba guitar-ji küm 50 shi samar aliba sülen US kübok California nung alir kati pa ket nung Gibson guitar ka aliba aser kasaji Lennon-i tesüiba mapang atemba guitar asütsü akok ta osang sangoktsüba sülen tan guitar-ji tanaben bushiteta liasü.

Tan guitar ayokba nungi anguba sen shilem ishika Lennon aser pa kinüngtsü, Yoko Ono nati angati agi tangar yairtsü asoshi tentetba Spirit Foundation, Inc. senpong nung inoktsüogo.

Ano külen, Beatles züngsem, Ringo Star-i tesüiba mapang, 1964 küm agiba America’s Ed Sullivan television sentong nung amshiba drumhead ka dollar sen million 2.1 agi Julien’s-isa ayokba osanga jangjaogo.